Нооруз майрамыңыздар кут болсун!

Урматтуу мекендештер,
Кадырлуу калемдештер,
Баарыңыздарды улустун улуу күнү – Нооруз майрамыңыздар менен куттуктайбыз!
Нооруз жаңы жылдын, күн менен түн теңелген жаңы күндүн майрамы. Токчулуктун, молчулуктун, берекенин майрамы. Жер жарылып чөп чыккан жадыраган жаздын, жаңылануунун, жаңыруунун майрамы.
Ата бабаларыбыз бул күнү кош өгүзгө соко кошуп жер бетин жаңы жылдын эсебинен алгачкы ирет тилип, эгин айдашып, апаларыбыз көжө, сүмөлөгүн жайнатып, жаңы кийимдерин кийип жакшы тилек менен майрамдап келишкен. Бүгүнкү күнү да ошондой шаң, маанай менен майрамдап келүүдөбүз. Нооруз майрамына карата канчалаган үйдө сүмөлөк кайнатылып, канча тилектер айтылат. Жүздөгөн, балким миңдеген энелер элге, жерге тынчтык тилейт, ак сакалдуу аталарыбыз баталарын берип, жаштарыбыз таза кыялдарын билдиришет. Ушул улуу майрам жалпы элдин тилегин, ой кыялын, үмүтүн бириктирип турат. Ой тилек, айтылган ар бир сөз материалдашат дейбиз, ылайым ишке ашсын. Апаат-кырсыктардан алыс болуп, элибизде, жерибизде тынчтык өкүм сүрүп турсун. Акындарыбыз бейпил күндүн ырын ырдап турсун. Ар бир үйгө жакшылык, ынтымак ырашкерлик, береке, молчулук каалайбыз.

Нооруз майрамыңыздар кут болсун!
КРУЖС Башкармалыгы