Кыргыз Республикасынын Улуттук жазуучулар союзун колдоо максатында 2022-жылдын 9-декабрына белгиленген Марафон жыйынтыкталды. Марафонго КР Жогорку Кеңешинин депутаттары, КР Маданият, маалымат, спорт жана жаштар саясаты министринин өкүлү Б.Секимов, мамлекеттик жана коомдук ишмерлер, маданият ишмерлери, ишкерлер, акын-жазуучулар катышты. Чет өлкөдө эмгектенип жүргөн мекендештер да четте калган жок. Багыт Бапанов баштаган калемгерлер 20000 рубль которду.
КР Маданият, маалымат, спорт жана жаштар саясаты министринин өкүлү Б.Секимов өз сөзүндө КР Президенти С.Н.Жапаровдун тапшырмасы менен жакынкы аралыкта Жазуучулар союзуна жаңы имарат берилерин, карызы жоюларын, акын-жазуучулар колдоого алынарын билдирди.
Марафондун жүрүшүндө Кыргыз улуттук “Манас” театрынын чыгармачыл жамааты концерттик программа тартуулап, акындар, “Жаңы толкун” адабий клубунун жаш таланттары ыр окуп турушту.
Марафонго катыша албай, эсеп-счетко которуп коюу ниетин билдиргендер арбын болду. Андыктан марафондон түшкөн каражаттын жалпы суммасы жарыяланган жок. 12-декабрга чейин банктык эсептер ачык болот. Алдыда адабият күнүн өткөрүп алгандан соң эсептөө комиссиясы жалпы жыйынтык чыгарат.
Марафон өткөрүүгө колдоо көрсөткөн Маданият, маалымат, спорт жана жаштар саясаты министрлигине, А.Осмонов атындагы Кыргыз улуттук китепканасына, Кыргыз улуттук “Манас” театрына терең ыраазычылык билдиребиз.
