А.Осмонов атындагы Кыргыз улуттук китепканасында КР Эл жазуучусу О.Айтымбетовдун 75 жылдыгына арналган “Кылымдарды карытчу залкар инсан” аттуу конференция болуп өттү. КР Улуттук жазуучулар союзунун төрагасы Н.Калыбеков, КР Президентинин кеңешчиси, КР Эл жазуучусу Ч.Абыкеев, А.Жакшылыков, Ж.Кулманбетов ж.б. акын-жазуучулар, маданият жана искусство ишмерлери катышты. Конференциянын катышуучулары О.Айтымбетовдун чыгармачылыгы боюнча сөз кылышып, эскеришти.
Мекенди сүйүүгө, маданиятка, кыргыз тилин, адабиятын өнүктүрүүгө, кыргыз тарыхын тактоого эбегейсиз эмгек өтөгөн О.Айтымбетовдун чыгармачылыктагы мурасын жайылтуу, эмгектерин колдонуу, түбөлүк сактоо максатында конференциянын катышуучулары: О.Айтымбетовдун ысымын Балыкчы шаарынан бир мектепке ыйгаруу, тарыхый эмгегин, чыгармаларын мамлекеттик деңгээлге көтөрүү, китептерин кайрадан басып чыгарып, китепканаларга таратуу, басып өткөн жолу, чыгармачылык жана тарыхый ишмердүүлүгү тууралуу илимий макала, эскерүүлөрдү жазып, атайын жыйнак чыгаруу, өмүрү, ишмердүүлүгү тууралуу документалдуу фильм тартуу, чыгармаларынын электрондук базасын түзүү, чыгармаларын жана “Кара кыргыз” тарыхый эмгегин башка тилдерге которуу боюнча резолюция кабыл алышты.
