“Мекенге таазим” жаш акын жазуучулардын республикалык фестивалы жана “Жаш калем” конкурсу жыйынтыкталды. Үч күнгө созулган фестивалга республикабыздын бардык аймактарынан жалпы 115 жаш талант катышты.
Фестивалдын жүрүшүндө он секция иштеп, түрдүү жанрларда жазган жаш таланттар тажрыйбалуу акын-жазуучулардын сынынан өтүштү. Секция башчылары болгон кыргыз элине таанымал акын-жазуучулар жаш таланттарга чыгармачылыктагы иш-тажрыйбасын айтып, кеп-кеңешин берди.
Бүйүр кызыткан конкурстун жыйынтыгы сыйлык тапшыруу аземи башталганга жарым саат калганда чыкты. Сыйлык тапшыруу иш-чарасы чоң салтанат менен Токтогул атындагы филармониянын кичи залында өттү.
Оболу фестивалдын эң жаш катышуучуларына атайын сыйлыктар тапшырылды. Залкар жазуучу Төлөгөн Касымбековдун эң кенже уулу, он төрт жаштагы Асылбек Касымбеков конкурстун эң жаш катышуучусу катары атайын сыйлыктын ээси болду.
Фестивалдын лауреаттары жана конкурстун баш байгесинин жана 1-орундун жеңүүчүлөрү болуп, төмөнкү жаш таланттар табылды.
Баш байге: Лира Камчыбекова, жаш акын.
1-орун: Мырзайым Айтимбетова, жаш акын; Элдияр Элчибек, жаш жазуучу; Артем Хегяй, жаш котормочу.
Ушул эле жанрларда экини жана үчүнчү орундарды алган жаш таланттарга да атайын сертификаттар, баалуу сыйлыктар берилди.
Биринчи орунду алгандарга ар бирине 20 000 сом;
Экинчи орунду алгандарга ар бирине 15 000 сом;
Үчүнчү орунду алгандарга ар бирине 10 000 сом.
“Тарых жана маданият жылын” өткөрүү боюнча мамлекеттик дирекция фестивалдын демилгечилеринин бири жана эң негизги демөөрчүсү болду.
“Прогрессивдүү демилгелер фондунун” президенти, белгилүү ишкер Аскар Салымбеков жана “Саякбай манасчы” фондунун атынан манасчы Рыспай Исаков фестиваль лауреаттарына атайын сыйлыктарын тапшырып, бул саамалык жаш таланттардын демине дем, күчүнө күч кошту.
Мамлекеттик тил боюнча Улуттук комиссия фестиваль катышуучуларына жалпы суммасы 85 000 сомдук эң мыкты китептерди белек кылды.
Андан да кубанычтуусу: комиссия төрагасы, белгилүү акын жана драматург Эгемберди Эрматов конкурста жеңишке жетишкен 5 жаш акын-жазуучунун китептерин комиссиянын эсебинен чыгарып бермей болду.
Улуттук Жазуучулар Союзу конкурс жеңүүчүлөрүн Союз мүчөлүгүнө кабыл алды.
Андан сырткары Улуттук Илимдер Академиясынын президенти, сынчы жана котормочу, илимпоз, академик Абдыганы Эркебаев конкурс жеңүүчүлөрүнө өз сыйлыгын тапшырды.
Улуу Британия, Россия, Казакстандан бери коноктор катышкан бул масштабдуу фестиваль жаш таланттарга дем-күч бергени талашсыз. Мындай деңгээлдеги иш-чара эгемендүүлүк жылдарында бир да жолу өткөрүлгөн эмес экен. Уюштуруучулар жана демөөрчүлөр бул фестивалды мындан ары туруктуу өткөрүп туруу, ал үчүн каржы булактарын издөө сунуштарын айтышты. Сунуш бир добуштан колдоо тапты.
Жаш таланттардын таланты өркүндөй берсин. Чыгармачыл дем, ийгилик каалайбыз!
“Майдан.kg” гезити, 04.10.2016-ж.
