Жаш калемгер Марлэн Матназаровдун кенже балдар үчүн жазылган “Бай бала” аталышындагы жомоктор жыйнагы жарык көрдү.
Аталган китепке улуттук колориттеги иллюстрациялар камтылган жана коммерциялык максатта сатууга коюлат. Китептин редактору: балдар акыны, жомокчу, энциклопедист 20дан ашуун китептин автору Ысмайыл Кадыров. Сүрөтчүсү: “Tart” жаш сүрөтчүлөр уюшмасынын мүчөсү Мар Амандыков.
Китептин 1000 нускада чыгуусуна жеке ишкерлер демөөрчүлүк кылышкан. Жомоктор жыйнагы Бишкек, Ош шаарларындагы китеп дүкөндөрүнө таратылат жана башка конкурстук иш-чаралар өткөрүлөт. Автор китептерден түшкөн акчаны чогултуп, улуттук баалуулукту чагылдырган мультфильм тартууну ниет кылат.
Марлэн Матназаров 23 жашта. Учурда Борбордук Азиядагы Америка Университетинин юриспруденция тармагында магистратурада билим алууда. 2020-жылдан бери ЮСАИДдин “Окуу керемет” долбоорунда эң жаш жазуучу катары өлкөбүздүн кыргыз мектептеринин 1-4-класстарынын окуучуларына жомок, аңгемелерди жазат.
Долбоордун алкагында автордун 4 жомок китеби жазылган. 2019-жылы “Кара-Суудагы Койчумандан он эки баян” аталышта чыккан кыргыз-англис тилдериндеги жомоктор жыйнагы дүйнөлүк Амазон интернет дүкөнүндө сатыкта. 2019-жылы декабрь айында окуудагы жетишкендиктери үчүн Президенттик “Үмүт” стипендиясынын ээси болгон.
