Кыргыз адабияты оор жоготууга учурады
КР Улуттук жазуучулар союзунун мүчөсү, Маданияттын мыкты кызматкери, жазуучу, акын Мырзабек Чокотегин дүйнөдөн кайтты.
Мырзабек Чокотегин 1949-жылы Жумгал районундагы азыркы Куйручук айылында дыйкандын үй-бүлөсүндө жарык дүйнөгө келген. Мектепти аяктаган соң, Аскер-Деңиз флотунда аскердик кызмат өтөгөн. 1967-1972-жж. Ж.Баласагын атындагы КУУнун экономика факультетин, 1990-1996-жж. юридикалык факультетин аяктаган. Кесиптик тажрыйбасын Москва, Харьков шаарларында жогорулатып келген.
Эмгек жолун Айыл чарба министрлигинин борбордук аппаратында жетектөөчү адис кызматынан баштап, бөлүм башчы, башкы адис, чарбачылык жүргүзүүчү жамаатта жетекчилик кызматтарын аркалаган.
1997-жылы муун ооруларынан улам ишмердүүлүгүн токтоткон. 1-топтогу майып.
Өмүрүнүн акырына чейин адабий көркөм чыгарма жазуу, илимий иликтөөлөр менен алектенип келген. “Нарбаш”, “Бир заман…” тарыхый романдарынын, аңгеме, повесть, ыр жыйнактардын, илимий-популярдык, илимий (анын ичинен 1 илимий монографиянын, 2 окуу куралынын) – 20дан ашуун китептин автору. КР Улуттук жазуучулар союзунун мүчөсү, “Арча” адабий сыйлыгынын лауреаты, Маданияттын мыкты кызматкери.
Жазуучу, акын Мырзабек Чокотегиндин дүйнөдөн өткөндүгүнө байланыштуу үй-бүлөсүнө, бир-туугандарына, жакындарына терең кайгыруу менен көңүл айтып, аза кайгысын тең бөлүшөбүз.
КРУЖС Башкармалыгы
