Бүгүн КРнын Эл акыны Рамис Рыскуловдун туулган күнү.
Биз сыйлаган, биз сыймыктанган улуу акындын туулган күнү менен куттуктайбыз!
Рамис Рыскулов Чүй облусунун Москва районунун Кызылтуу айылында 1934-жылы 9-сентябрда туулган.
1951-жылы Фрунзе педагогикалык окуу жайын бүтүрүп, Москва шаарындагы ВЛКСМ Борбордук Комитетине караштуу Борбордук Комсомол мектебине жөнөтүлөт. Бул мектептеги 2 жылдык окуудан кийин М.Горький атындагы Бүткүл Союздук адабият институтуна өтөт.
Эмгек жолун “Кыргызстан пионери” гезитинин редакциясында адабий кызматкер болуп иштөөдөн баштаган, кийин “Ленинчил жаш” гезитинин редакциясында, 1959–1960-жж. “Ала-Тоо” журналынын редакциясында эмгектенген.
Анын ырлары “Кыргызстан маданияты”, “Эркинтoo” ж.б. гезит беттеринде жарыяланган. Акын ак ырды киргизүү менен кыргыз совет поэзиясын жаңырткан.
Биринчи ырлар жыйнагы “Жаз” 1959-жылы жарык көргөн.
Ал кыргыз тилине А.С.Пушкиндин, В.В.Маяковскийдин, Н.А.Некрасовдун, Л.Вознесенскийдин, X.Алимжандын ж. б. чыгармаларын которгон.
1986-жылы “Ырлар” жыйнагы А.Осмонов атындагы адабий сыйлыгына татыктуу болгон.
1959-жылдан СССР Жазуучулар союзунун жана 1990-жылдан СССР Сүрөтчүлөр союзунун мүчөсү.
1987-жылы СССР Эл чарбасынын жетишкендиктеринин көргөзмөсүнүн лауреаты болгон.
Кыргызстан ЛКЖС Борбордук Комитетинин Ардак грамоталары менен сыйланган.
1995-жылы “Кыргыз Республикасынын маданиятына эмгек сиңирген ишмери”, 1996-жылы “Кыргыз Республикасынын Эл акыны” ардак наамдары берилген.
Урматтуу Рамис Рыскулович, сиз чыгармачылыктын түмөн түйшүктүү жолунда талыкпай эмгектенип, зор кадыр-баркка, урмат-сыйга ээ болдуңуз. Байбичеңиз менен дөөлөттүү карылыкта уул-кыздардын, жалпы кыргыз элинин сыйына татып, бактылуу өмүр кечирип келүүдөсүз. Буюрса алдыда токсон жылдык тоюңузду тойлоп, ак калпак элиңиздин ак батасын алыңыз. Сизге бекем ден-соолук, узак өмүр каалайбыз. Көп жашаңыз.
Урматтоо менен,
КРУЖС Башкармалыгы
